میڈے چودھار پانڑیں ہے کنارہ کُئی نظردا نئیں بھلیندا عرش دو جیکر ستارہ کُئی نظردا نئیں میکوں وی علم ہا کجھ کجھ ولا جوشی وی آکھیا ہے تیڈی زندگی دے کہیں ڈکھ دا اتارا کُئی نظردا نئیں میڈے جیونڑ دا کُئی پل گزارے لائق ہووے ہا گزارا کر ونجاں ہا میں گزارا کُئی نظردا نئیں کڈھاؤ کُئی وینڑ نئیں آندا نہ ہنڑ کئی کوک آندی ہے میں کیڑھی سمت ونجڑاں ہے اشارہ کُئی نظردا نئیں میڈے اندر میڈے وانگوں کئی مہمان وسدے ہن سوا میڈے بیا میکوں ڈکھارا کُئی نظردا نئیں میں سانول ستر اینجھی ہاں جیرھی کہیں دے وی کم دی نئیں میڈے وانگوں میکوں جگ وچ آوارہ کُئی نظردا نئیں نہ اپنڑیں آپ دا ساجن نہ ساجن کہیں بنڑایا ہے حیاتی دا قیامت تک سہارا کُئی نظردا نئیں سئیں عبدالکریم ساجن صاحب شاہصدردین